Sigrún Magnúsdóttir, Gleymd stjarna!

Sigrún Magnúsdóttir (1904-1981) var fyrsta söngleikjastjarna Íslendinga hún var aðalstjarnan í fyrstu óperettum sem  settar voru upp hér á landi og einnig söng hún aðalhlutverkið í fyrstu óperunni sem hér var sett upp (Systirin frá Prag 1937) Vinsælustu óperetturnar hennar voru Bláa Kápan, Brosandi Land og Nitouce 1941 sem sló öll fyrri aðsóknarmet í Iðnó en þar söng hún aðalhlutverkið á móti Lárusi Pálssyni. Hún kom síðast fram í Leðurblökunni í Þjóðleikhúsinu 1954.

En Íslendingar eru fyrir löngu búnir að gleyma Sigrúnu þrátt fyrir glæstan feril. Upptökur með söng hennar er hvergi að finna á hljómplötum, úr því þarf að bæta og ég panta hér með safnplötu með upptökum fyrstu íslensku söngleikjastjarnanna, þessar upptökur eru til en þær eru varðveittar í dimmum kjöllurum Ríkisútvarpsins. Mig langar til þess að setja inn á þessa síðu, eina upptöku með Sigrúnu. Upptakan er gerð 26. mars 1945 og þar syngur hún og trallar djass lagið Dinah eftir Fats Waller. Þess má geta að þessi upptaka er aðeins til í einu eintaki, eignaðist ég þessa fágætu plötu fyrir nokkrum árum. Ég biðst afsökunar á slæmum upptökugæðum en þrátt fyrir þau má vel njóta frábærra listhæfileika Sigrúnar Magnúsdóttir. Líkast til er þetta einnig elsta upptaka á íslenskri djasstónlist. 

Athugasemdir

[Hlynur Þór Magnússon, 9.2.2007 kl. 22:33]

Íslendingar búnir að gleyma Sigrúnu, segir þú. Má vera að nokkuð sé til í því. Aftur á móti eru Ísfirðingar ekki búnir að gleyma henni, a.m.k. ekki þeir eldri og ekki þeir sem enn í dag koma við sögu Litla leikklúbbsins á Ísafirði. Sigrún Magnúsdóttir var systurdóttir Jónasar Tómassonar tónskálds eldra, ef ég man rétt, hún fæddist á Ísafirði og þar dó hún.

[Valgarður Stefánsson, 10.2.2007 kl. 00:22]

Allveg rétt hjá þér. Ég var lengi í sambandi við systur hennar Arnþrúði Aspelund á Ísafirði sem veitti mér ómetanlegar upplýsingar um Sigrúnu. Í framhaldi af því gerði ég útvarpsþátt um Sigrúnu og skrifaði um hana Lesbókargrein. En upptökurnar bíða ennþá óbættar hjá garði og Sigrúnu hefur því ekki verið sýndur sá sómi sem hún á svo vissulega skilið.