slítum stjórnkálasambandi við usa

það kemur ekkert annað til greina en að slíta stjórnmálasambandi við slíkt glæpamannasamfélag sem Bandaríkin eru orðin. Köllum sendiherra okkar strax heim og vísum öllum Bandarískum diplómötum úr landi. Og það strax! Ef til vill eru það þau skilaboð sem Bush þarf að fá að fá svo hann fatti alvöru málsins. Að öðrum kosti eigum við að handtaka alla ameríska borgara sem hingað koma og setja þá í gapastokka öðrum til viðvörunar.

 

Mun krefjast afsökunarbeiðni

A landslið gegn B landsliði

Vonandi verður næsti leikur íslenska A landsliðsins í fótbolta gegn B landsliði okkar sem t.d. íþróttafréttamenn fá að velja. Hörmungarsögu íslenska A landsliðsins verður að ljúka og því tel ég að því sé fyrir bestu að spila næst gegn úrvali leikmanna úr úrvalsdeildinni áður en þessir "kappar" fá næsta tækifæri að keppa fyrir okkar hönd.  

Íslendingar sáu aldrei til sólar í fimm marka tapleik

Rétt kona á réttum stað!

Fagna því að Jóhanna er komin í áhrifastöðu, þessi málaflokkur er búinn að gjalda þess alltof lengi að hafa verið í höndum óhæfra Framsóknarmanna sem hugsuðu fyrst og fremst um eigið skinn og vina sinn. Trú því að Jóhanna komi auga á spillingarmálin sem hrúguðust upp í þessum málaflokki undir lélegri stjórn manna eins og Jóns Kristjánssonar sem kom engu í verk og hlustaði aðeins á raddir sem honum voru þóknanlegar. Velkomin Jóhanna!

Jóhanna snýr aftur í félagsmálaráðuneytið

Dro ho ho ti ti ti tinn ge ef efi þé eeer fr iiii ððð

Var að hlusta á útvarpsmessuna eins og ég geri alltaf af gömlum vana,  prédikunin var ágæt en mikið skelfilega er mér farið að leiðast þegar presturinn og kórinn rappa upp úr messusöngbókinni. Nú finnst mér tími kominn til að breyta þessu a.m.k. í útvarpsmessum. Sleppa messusöngbókinni  og gera athöfnina markvissari með því að stytta útsendinguna einnig um helming. Ég tel að fleiri fengjust  þá til að hlusta á messurnar. Það má mín vegna bæta þessa breytingu upp með því að útvarpa einnig hálf tíma kvöldmessu á virkum degi einu sinni í viku. Prestar eru misjafnir eins og þeir eru margir og sumir geta bara alls ekki tónað það er  skelfing að heyra þá suma tóna, Dro ho ho ho ti ti ti tinn ge ef efi þé eeer frr iiii ðððð eða Dro ho ho ho ti ti ti tinn sé eee me me me með yð uuuu rrr.

Valgerður Sverrisdóttir og Paris Hilton

 

Nú fer óðum að styttast í Alþingiskosningar og frambjóðendur reyna með öllummeðulum að láta á sér bera, þeir troða sér inn í fjölsóttar jarðafarir, sækja tónleika, sýna sig á stórmörkuðum,sundlaugum, leikhúsum og þar fram eftir götunum. Engin vænlegur viðburður fer fram hjá þeim í von um ókeypis kynningu. En þeir haga sér greinilega ekki eins og almúginn, frambjóðendurnir eru ekki mættir í jarðafarir til þess að sýna hluttekningu, nei þeir eru mættir til þess að láta vita af sér og standa því nokkrum sinnum upp og ganga afsíðis til þess að þykjast tala í síma. Athöfnin vekur á þeim athygli og allir syrgjendur vita nú að viðkomandi þingmaður er viðstaddur þótt enginn geri sér grein fyrir samhenginu.

 Dæmi:Á tónleikum í Báthúsinu á Siglufirði voru þau saman Ingibjörg Sólrún og Kristján Möller, þau sátu á fremsta bekk. Á meðan á tónleikunum stóð voru þau gríðarlega óróleg stóðu upp í sífellu og gengu fram og aftur um troðfullt húsið annað hvort saman, eða einsömul. Það fór ekki fram hjá neinum að þau voru mætt á staðinn og Kristján Möller var þessa kvöldstund svo sannarlega besti vinur Ingibjargar. Heilsíðuauglýsingar með myndum af frambjóðendum fylla nú öll blöð. Ein slík með mynd af Paris Hilton, Íslands, Valgerði Sverrisdóttur birtist í Dagskránni á Akureyri í gær, þar bauð hún til súpufundar kl. 12.00. þann sama dag. Gallinn er bara sá að blaðið fer ekki í útburð fyrr en kl. 16.00 því hefur Vala greinilega sopið súpuna í einsemd mikilli. En súpan var vissulega ekki aðalatriðið, heldur heilsíðuauglýsingin ásamt litmynd af frambjóðandanum, það var auðvita markmiðið að myndin bærist inn á öll heimili, aukaatriðið var súpan, því það var fyrirfram vitað að enginn nyti hennar nema Valgerður og hver veit nema súpan hafi bara alls ekki verið fram borin? Ég tengdi Valgerði við Paris Hilton hér á undan já, þær eiga það sameiginlegt að daglega hafa íslensk dagblöð birt af þeim myndir, jafnvel svo árum saman. Það er því alveg ljóst að íslenskir blaðamenn og ljósmyndarar fylgja henni hvert fótmál og ekki leiðist henni öll athyglin og lætur hún vita af öllum athöfnum sínum stórum sem smáum svo ekkert fari nú fram hjá okkur og fær í hvert sinn ókeypis auglýsingu í staðin.

Það skal tekið fram að þessi pistill er Valgerði, Kristján Möller og Ingibjörgu Sólrúnu að kostnaðarlausu.

Raddir hermanna úr Íraksstríðinu

Nýjasta tölublað Newsweek 2. april er allveg magnað aflestrar. Upplifun hermannanna sjálfra á stríðinu er gríðalega áhrifamikil. Vonleysið, tilgangsleysið já og til hvers? Hver frásögn er sérstök upplifun og allir sögumenn hafa látið lífið á þessum guðsvolaða stað. Ég hvet ykkur til þess að kynna ykkur þetta einstaka eintak af Newsweek. Á meðan á dvölinni í Írak stóð, sendu þessir hermenn póst heim til vina og kunningja og sögðu frá því sem aldrei kom í fréttum. En nú hefur Newsweek safnað saman yfir 100 bréfum frá þessum hermönnum og birtir þau ásamt myndum af viðkomandi. Öflugra mótspil gegn þessu fáranlega stríði hefur ekki sést!

 

Hlaðvarpinn og niðurhal hjá Rúv.is

Það hljómar vel sú nýja þjónusta sem Ríkisútvarpið veitir með niðurhali á efni fyrir mp3 skrár og Ipodda en málið er ekki allveg svo einfalt. Það er ekki nóg að segja "save target" og þá ætti niðurhalið að fara af stað og taka aðeins fáeinar sekúndur í niðurhali. Nei það þarf að stinga mp3 spilaranum í samband og hlaða efninu inn og þá tekur það klukkustundar efni nákvæmlega eina klukkustund að hlaðast niður. BBC, Danska útvarpið og það Sænska og fjöldi annarra stöðva bjóða upp á miklu betri og flótvirkari niðurhal, nefnilega "Save target" aðferðina. Það hefði nú verið betra að bíða með þessa framkvæmd þar til kunnáttufólk hefði fengist til starfa og gert hlutina auðveldari frá upphafi. Því svo ekki að bjóða líka upp á niðurhal af sjónvarpsefni ? Fjölmargar sjónvarpsstöðvar  út um allan heim, bjóða upp á slíka þjónustu. En vonandi verður fall fararheill og niðurhalið gert fljótvirkara og einfaldara hið allra fyrsta. Vil benda á flotta djassþætti hjá danska útvarpinu og frábært sjónvarpsefni grín og glens frá því ástralska. Og það góða er! Niðurhalið tekur fáein sekúndubrot, það er hægt að geyma það síðan í tölvunni og draga það síðann í mp3 spilarann þegar þannig stendur, á svipstundu.

Útvarp Reykjavík, morgunútvarp - In Memorian

Einu sinni var til útvarp sem útvarpaði léttri tónlistardagskrá í morgunsárið, þessi tónlist var í bland klassík, djass og dægurlög á rólegum nótum. Það var þægilegt að hafa útvarpið opið, svona án þess að vera endilega að hlusta sérstaklega. Útvarpið veitti nefnilega andlegan félagsskap og stundum lagði maður við hlustir og naut góðrar tónlistar eða bara gleymdi að útvarpið var opið og naut þess samt. Þessir tímar eru fyrir löngu liðnir. Það er búið að eyðileggja morgunútvarpið með andfélagslegum kjaftavaðli. Gamla góða morgunútvarpið heyrir sögunni til, blessuð sé minning þess.

Sunday Times og skopteikningu af Ingibjörgu Sólrúnu?

Var að lesa heimsendaspádóma í Sunday Times magazine og sá þá mér til mikillar armæðu að bretinn á líka sína Ingibjörgu Sólrúnu. Maður hefði nú haldið að eitt eintak af henni væri allveg nóg. Læt myndina fylgja með til gamans svo þið getið dæmt um afbrigðið.

Prímadonnurnar

HaHaHaHaHaHaHaHA, já ég gerði mér ferð í Freyvangsleikhúsið á föstudagskvöldið og sá gamanleikinn "Prímadonnurnar" og þakka Guði fyrir að hafa ekki hlegið mig í hel. Þetta var ein sú allra besta skemmtun sem ég hef séð um langan tíma, slær jafnvel kvikmyndina Borat út. Þessi farsi er skrifaður í anda "Frænku Charles" sem lifir enn þá í minningunni í dönsku bíómyndinni með Dirch Passer og Ove Sprogöe sem "allir" sáu í "den gamle gode dage". Ef þið þurfið að koma hláturkirtlunum í gang þá vitið þið nú hvert þið eigið að fara

Góða skemmtun!