Kjarasamningar eru bara viðmiðun, ef þú ert þægur/þæg færðu kannski meira

Launamál Iðjuþálfa hjá Sjúkrahúsum hafa verið nokkuð í umræðunni síðustu daga. Það hefur ekki farið hátt en það er á margra vitorði að launamunur starfstétta á sjúkrahúsum getur verið 10faldur. Stjórnendur sjúkrastofnanna skammta sjálfum sér að sjálfsögðu ofurlaun og öllum þeim viðhlægendum sem smjaðra í kringum þá. Forstjóri Tryggingarstofnunar hefur yfir milljón á mánuði í laun á mánuði sem er í flestum tilfellum 10fallt hærri upphæð en sú sem skjólstæðingar hans fá við úthlutun. Sumir halda að launaleynd sé í landinu, það er alragnt. Stjórnendum þessara stofnanna er skylt samkvæmt lögum að gefa upp laun starfsmanna, sé óskað eftir því. Gallinn er bara sá að stjórnendur vilja ekkert vita af þessum lögum. Því segi ég og stend við það að stóru sjúkrahúsunum á Íslandi er flestum ef ekki öllum stjórnað af gjörspilltum forstjórum og framkvæmdastjórum. Þessir aðilar hafa valið sér hirð starfsmanna sem þeir hygla með ofurlaunum og fríðindum. Þá er ekki farið eftir kjarasamningum enda var lögunum breytt fyrir mörgum árum sem gáfu stjórnendum geræðislegt vald til þess að gera vel við suma. Fjórðungssjúkrhúsið á Akureyri er líkast til augljósasta dæmið um spillingu á þeim vettvangi. Ofurjepparnir sem standa í löngum röðum fyrir utan spillingabælið tala sínu máli. Ég dáist hins vegar af því fólki sem hefur ekki haft geð í sér að nudda sér upp við þennan háa aðal. Launaútgjöld eru vissulega stærsti útgjaldaliður þessara stofnanna, en kökunni er ekki skipt, það eru ákveðnir aðilar sem hirða alla stærstu bitana. Og svo virðast þessir sjálftökumenn í launum vera æviráðnir, á hverju ári er þeim bætt umframeyðslan með enn þá meiri hækkun framlaga, já stundum næstum samstundis. Því meiri sem umframkeyrslan er þeim mun meiri virðingar hljóta þessir aðilar. og þeim mun þaulsetnari verða þeir. Starfsmannastefnur eru aðeins notaðar sem og munnþurkur á viðkomandi stofnunum. Heilbrigðisráðherrar hafa heldur ekki verið mannanna bestir þegar kemur að ráðningum viðhægjenda þeirra í stöður. Láta þeir fylgja sérstakar óskir um ríflega umbun viðkomandi vina sina  og til þess að styggja ekki ráðherra er gert vel við útvalda. Á Fjórðungssjúkrahúsinu á Akureyri eru þess dæmi að launakostanður hefur hækkað á litlum deildum um allt að 4oo % eftir að ráðherra óskaði eftir því með 10 milljón króna mútum (Jón Kristjánsson) að koma sínum manni að við kjötkatlana. Í raun og veru eru þessi spillingamál ríkistofnanna svo stór í sniðum að engin ábyrgur aðili fæst til þess að fletta ofan af glæpunum. Þeir eru varðir af ríkiendurskoðun og ráðherrum til þess að geta haldið áfram að sukka með fé og viðhalda ímynd sinni út á við. Þannig er íslenska heibrigðiskerfið rekið í dag. Spilling blómstrar meðan þjóðfélagið þeygir. En hátt yrði þeirra fall ef einhver þyrði að kafa ofaní í þessi mál.

meira síðar!

 

Vonandi verður Barack Obama næsti forseti Bandaríkjanna

Það hljóta margir að fagna þessari frétt, vonandi hafa hinir þvinguðu og illa upplýstu Bandaríkjamenn vit til þess að gefa Obama ætkvæði sitt í næstu forsetakosningum og hafna um leið ættar og  tengda-veldi embættisins. Ég á nokkra vini í Bandaríkjunum og það var skrítið að lesa síðustu jólakortin frá þeim. Jólakortin voru uppfull af afsökunarbeiðnum um framferði og mistök Bush stjórnarinnar í alþjóðamálum. Áður en Bush varð forseti hafði hann aðeins einu sinni ferðast út fyrir landamæri  USA og ferðalagið var til Mexico. Þótt Obama sé ungur þá hefur hann farið víða og er nokkuð vel að sér í alþjóðastjórnmálum. Obama var einnig á móti innrásinni í Írak en það var Hillary ekki, fyrr en eftir á þegar henni varð ljóst hversu herfileg mistök hefðu átt sér stað.

Barack Obama saxar á forskot Hillary Clintons

Við gengum tvö, hugljúf ástarsaga!

Deilt er nú um það hvort það hafi verið Ragnar Björnsson eða Friðrik Jónsson sem sömdu lagið við þann vinsæla texta "Við gengum tvö" eftir Valdimar Hólm Hallstað (1906-1989) fyrrum bóksala á Húsavík. Ég tek ekki afstöðu! En á bak við þennan texta er virkilega harmræn ástarsaga sem væri verðugt efni í einn sjónvarpsþátt. Árið 1935 missti Valdimar Hólm unnustu sína eftir erfið veikindi, hún var þá aðeins 22ja ára gömul. Til hennar samdi hann marga texta og lang frægastur er án efa "Í fjarlægð". Valdimar kvæntist og ein dóttir hans ber nafn fyrrum unnustu Valdimars og það sem mér finnst hvað hjartnæmast er sú tryggð hans, að láta grafa sig við hlið æskuástarinnar. Nöfn þeirra eru greipt í sama steininn. þau höfðu náð saman aftur- í eilífðinni.

Þessi frétt minnir nú á skaupið

Blessuð krónan styrktist í dag það eru aldeilis góð tíðindi- fyrir suma.  Já og hagvöxturinn er ofmetinn og skuldir heimilinna eru aðeins 716 milljarðar. Maður gleðst auðvita, best að fá sér tesopa strax og fagna þessum fréttum með sjálfum sér- því staðan gæti orðið allt önnur á morgun.

Krónan styrktist um 0,33%

Heimur versnandi fer

Var að lesa það í USA Today að Ungverjar vilji leyfa barnaklám að vissu marki (14-17 ára). Siðferðisvitund manna virðist ekkert lagast með opnun landamæra. Ungverjaland er þar engin undantekkning. Austurblokkin nærist nú öll eins og hún leggur sig, á mikilli siðferðisspillingu og ósóma. Í Rússlandi er spillingin svo mikil að ekkert við hana ráðið og spurningin er: Finnst heiðarlegur maður í landinu? Nei þetta er nú kannski ofsagt. En manni blöskrar hvernig komið er fyrir þessu gamla stórveldi. Klámvæðingin flæðir þar inn og út um allar gáttir og ekkert fæst, nema fyrir mútur. Kannski hafa þessar þjóðir verið of lengi kúgaðar og frelsið þeim hefndargjöf.

Þetta blogg er kannski ekkert voðalega djúpt, en ég læt það bara flakka.

Engar myndir fylgja þessu bloggi!

Ó Guðmann bróðir besti

Ó Guðmann bróðir besti

og barnavinur mesti

þú ert svo lipur og laginn

 að loka á öskudaginn.

Þetta vers sungu krakkarnir á Akureyri á Öskudaginn hér á árum áður um kaupmanninn sem lokaði alltaf á Öskudaginn. En dagurinn lifir góðu lífi enn þá. Setti fáeinar myndir með þessum pistli til þess að sýna stemminguna í dag.

Blogglausi dagurinn er í dag

Var að renna augum yfir nýjasta blogið og fann enga vænlega beitu, flestir virðast nota sama agnið í dag og apa hver upp eftir öðrum sama bullið. Ákvað í framhaldinu að snerta ekki lyklaborðið það sem eftir er dags.

.

Enda allveg úrvinda eins og sú stutta.

Félag Fórnarlamba Framsóknarflokksins

Nú finnst mér vera tími kominn á það að stofnaður verði félagsskapur fórnarlamba Framsóknarflokksins. Framsóknarflokkurinn hefur setið lengi að kjötkötlunum og stungið vænstu bitunum upp í sig. Í engum stjórnmálaflokki þrífst jafnmikil spilling og plott um stöður og embætti. Og vísast til er Jón Kristjánsson fyrrum ráðherra sá maður sem á metið í mistökum á ferli sínum. Hann komst upp með allveg ólíklegustu klúður og þurfti ekki einu sinni að svara fyrir mistökin.  Var að taka saman lausleg klúðurfærslur í embættisferlum Jóns og tölurnar hlaupa fljótt á milljörðum. Er þjónkun hans við umframfjáraustur spítalana auðvita mestur. Mistök og klúður í stjórnárskrárgerð og álit vegna Hálsalóns kostaði c.a. 100 millur. Skiljanlegt að maðurinn var sviptur ráðherradómi, áður en hann varð flokknum og þjóð sinni til meiri vandræða.

 En gaman væri að fá viðbrögð við stofnun félagsskapar fórnarlamba Framsóknarflokksins. Það eiga margir um sárt að binda.

Klámstjörnurnar koma, engin hlutverk í boði

Mér sýnist að öll þessi móðursjúka umræða um klámstörnur á leið til landsins, stafi eingöngu af því að Íslendingum hefur ekki verið boðin nein hlutverk. Klámstörnurnar virðast bara ætla að nota landið sem bakgrunn og ekki leita til íslenskra aukaleikara um aðstoð.  Er nokkuð við þetta að athuga, því í raun og veru hefðu þessir aðilar ekki einu sinni þurft að koma hingað til þess að skapa fallegan bakgrunn. Í góðum myndverum er hægt að nota næstum hvaða bakgrunn sem er og láta atriðin gerast hvar sem er í veröldinni og hvenær sem er í tíma. Lofum þessu fólki að ferðast hingað átölulaust eins og hverja aðra siðprúða ferðamenn. Allir vita að klámi verður seint útrýmt, ekki frekar en Framsóknarmönnum og fá þeir þó að ganga frjálsir og jafnvel fara utan.

Andakukl og draugagangur frá liðinni tíð

 (Mynd. Draugagangur að Saurum 1964.)

Andakukl nútímans hefur verið mér sem lokuð bók í marga áratugi, ég fór fyrir nokkrum áratugum síðan á skyggnilýsingu ensks miðils, minnir að mér hafi liðið bærilega án þess þó að fá nokkur viðhlítandi svör. Jæja síðasta helgi var nokkuð öðruvísi. Sálarrannsóknarfélagið á Akureyri stóð fyrir andlegri helgi, ég og frúin mín ákváðum að láta slag standa og kynna okkur starfið.Í fyrstu var okkur boðið að fylgjast með transmiðli tala tungum og lýsa atburðum úr forneskju.Við settumst inn í myrkvað herbergi og miðillinn fór að tala tungum. Í fyrstu var hann franskur fræðimaður frá síðari hluta 18. aldar. Margir gullmolar féllu af miðlinum, sem aðeins glitti í frá rauðum bjarma í annars myrkvuðu herberginu. Mér þótti þó furðulegt að hann gat þó á engan hátt tjáð sig um frönsku byltinguna eða sagt hvort hann hefði verið konungssinni eða lýðræðissinni. Þar féll eiginlega trú mín á þessa samverustund  við franska fræðimanninn frá á 18. öld. En stundin var notaleg og fræðandi á margan hátt , ég var bara ekki allveg tilbúinn að meðtaka hráann vitnisburð gagnrýnislaust. Næst var mér boðið í heilun sem ég tók með þökkum, en það fór á sama veg Panflautu  tónlistinn truflaði gríðarlega og ég gekk jafn skakkur út og ég gekk inn. Þetta var á laugardaginn. Á sunnudagskvöldið mætti sjálfur Þórhallur miðill ásamt Skúla Lórenz fyrir fullu húsi gesta og færðu þeir öllum skilaboð að handan. Stundin var vel lukkuð, mikið hlegið og allir höfðu líkast til fengið einhverjum spurningum sínum svarað. Var þá ekki takmarkinu náð? Auðvita var því náð allir þátttakendur í þessari andlegu helgi hafa örugglega staðfest í trúnni á framhaldslíf. En fyrir mig var helginni ekki lokið. Þegar ég kom heim af skyggnilýsingunni tók ekki betra við. Ríkisútvarpið var að senda út “Andrarímur” Guðmundar Andra Thorssonar. Það fyrsta sem fjallað var um í þættinum voru transfyrirlestrar Guðrúnar Sigurðardóttur sem skráði sögu Ragnheiðar Brynjólfsdóttir í transi á sjöunda áratugi síðustu aldar og ekki nóg með það. Leikin var í þættinum upptaka með Guðrúnu þar sem hún talaði með ólíkum röddum sögupersóna, en það sem sagan gerist næstum öll á árunum 1654-1675 er slíkt auðvita allgjörlega ómögulegt. Ó nei! Guðrún Sigurðardóttir lék allar persónur og túlkaði viðburði úr íslenskri forneskju eins og að blása sápukúlum. 600 bls. bók fylgdi í kjölfarið þar sem saga Ragnheiðar Brynjólfsdóttir var rakin og atburðum í Skálholi um miða 17. öld. voru gerð skil.  Sjálfur man ég eftir Guðrúnu Sigurðardóttir þessari ljúfu konu sem átti heima í næstu götu við mig á bernskuárum mínum. Þessa yndislegu og ljúfu konu hefði ég aldrei getað tengt við svik af nokkru tagi. Því er bók hennar um Ragnheiði Biskupsdóttir einn af óútskýrðum  leyndardómum og atburðum sögunnar. Fyrir nokkrum árum eignaðist ég hluta af handriti bókar Guðmundar Davíðssonar Íslendingabyggð á öðrum hnetti (1929) en þá bók skrifaði hann ósjálfráðri skrift aðallega eftir bróður sínum Ólafi og föður sínum Séra Davíð Guðmundssyni á Hofi. (Afa Davíðs skálds frá Fagraskógi) ekkert þekkti ég til Guðmundar, en systkini hans þau Valgerður og Hannes urðu mér góðir vinir á æskuárum mínum, ég eignaðist jafnvel hluti eftir þau og meira að segja pínulítið eftir sjálfan Ólaf Davíðsson þjóðsagnasafnara. Önnur látin frænka mín sem ég nefni ekki hér, skrifaði lengi ósjálfráða skrift og þá frænku mína mun ég aldrei væna um pretti. Enn þá  lifir í mér  sú von að eitthvað sé að marka hina ósjálfráðu skrift Guðmundar Davíðssonar á Hraunum og Íslendingabyggð á öðrum hnetti. Það verður gaman að komast þar í kynni við forfeðurna. En svo ég haldi mig við þessa andlegu helgi á vegum Sálarrannsóknarfélagsins á Akureyri, þá tel ég að vel hafi verið að henni staðið. Ég vænti þess að fréttatímar fjölmiðlanna verði uppfullir af frásögnum næstu daga af því sem gerðist fyrir norðan og hlífi okkur hlustendum og lesendum við öllum neikvæðu fréttunum frá næturlífi stórborgarinnar og átökum á þekktum stríðssvæðum.